اعمل اي لو زهقت من المذاكره
عارف إنك زهقت و مخنوق من المذاكرة، ومن الطرق القديمة اللي بتخليك متعرفش تذاكر وبتمل من أول خمس دقايق، ونفسك تكون من المتفوقين، وديمًا بتقعد تفكر وتقول كيف احصل على اعلى الدرجات في الثانوية العامة، ودا حقك على فكرة وتقدر تعمل كدا، عشان كدا عملت ليك المقالة البسيطة، هشرحلك فيها أهم نصائح لطلاب الثانوية العامة للتفوق، وهقولك على طرق للمذاكرة حديثة ومجربة ومضمونة 100% في نجاحك لو مشيت عليها إن شاء الله، كل اللي عليك إنك تعمل كوباية شاي، وتقرأ المقالة دي بتركيز شديد ومتفوتش ولا كلمة، ويلا بينا يا بطل....
حل مشكلة عدم الرغبة في المذاكره
أول حاجة حاول إنك تحط هدف في دماغك واضح إنت ليه عاوز تذاكر، هل عشان مجبر ؟ ولا في كلية في دماغك بتسعى إنك توصلها بفارغ الصبر؟ وبتحاول إنك تعمل اللي عليك عشان تدخلها وتوصل لحلمك وتخطيطك؟
سواء دا أو دا فأنت في كلا الحالتين لازم تذاكر، مفيش خيار تاني، وعشان كدا اي رأيك إنك تحول المذاكرة لمتعة وتشيل من دماغك خالص حوار إنك مجبر والكلام اللي مالوش لازمة دا ...
هقولك على طريقة المذاكرة الصحيحة في الثانوية العامة وتنظيم الوقت وأهم النصائح اللي ممكن تفيدك ...
ازاي ادخل في مود المذاكره
في البداية لازم تبدأ بـ دعاء قبل المذاكرة، وهو : اللهم إني أسألك فهم النبيين وحفظ المرسلين والملائكة المقربين، اللهم اجعل ألسنتنا عامرة بذكرك، و قلوبنا بخشيتك، و أسرارنا بطاعتك، إنك على كل شيء قدير، حسبنا الله و نعم الوكيل.
1- تسجيل صوتي:-
أنت عالطول ماسك الموبايل أكيد، طب ماتستفاد منه! هقولك ازاي، شغل ريكورد الموبايل تمام وسجل لنفسك السؤال اللي انت مش عارف تحفظه أو مش عاوز يدخل دماغك، وبعد كدا اسمعه بتركيز، هتحس بفرق شديد، غير كمان وانت في المواصلات بلاش تسمع أغاني وتسمع بقا التسجيلات اللي انت سجلتها دي، ومرة في مرة هتحس إنك عاوز تسجل المنهج كله، لإن أكيد كل ما تعيد أكتر وتذاكر بكذا طريقة هيفيدك أكتر وهتثبت المعلومة في دماغك إن شاء الله.2- الخرائط الذهنية:-
ودي حاجة عظيمة جدًا وهتوفرلك وقت ومجهود، لو كنت مثلًا بتذاكر للكلية أو بتذاكر مثلًا مواد فيها كلام كتير ونظري، وعارفين طبعًا مدى رخامة المادة اللي من النوع دي، فالخرائط الذهنية هيا حل الموضوع دا، وهو عن طريق إنك هتعمل زي كلمات مفتاحية كدا لكل صفحة، يعني شوف العناصر احفظها كويس أوي، والكلام اللي تحتها دا اقراه برضو وطلع منه كلمة أو اتنين يذكروك بالصفحة كاملة واللي بنسميها أنا وأنت الهبد، يعني هتهبد في سياق الكلام والدرس اللي انت حافظه طالما انت ماسك كام كلمة مفتاحية وقوية في صلب الصفحة.
3- التركيز في المذاكرة:-
بلاقي كتير بيسأل السؤال دا عدد ساعات المذاكرة لطلاب الثانوية العامة، ودا برضو بيرجع لنقطة التركيز في المذاكرة،أهم حاجة من مذاكرتك والوقت اللي انت بتقضيه إنك تكون بتذاكر وبتثمن وقتك دا، يعني متكونش قاعد تذاكر مثلًا وماسك الفون ويجيلك اشعارات وتفضل فاتح ترد ع الناس أو تكتب كومنت هنا وهنا ومش مركز، بالتالي وقتك هيضيع، وهتطلع من غير أي حصيلة من الوقت دا، بعكس مثلًا لو قعدت ساعة مركز وباعد عنك كل حاجة ممكن تلهيك أو تعطلك، هتحس بفرق كبير، وحصيلة أكبر وفي وقت قليل جدًا.
4- تجميع الأسئلة:-
بعد ما تذاكر حاول إنك تجمع أسئلة الدروس من كتب المدرسة والملخصات وإنك تحاول تحل أكبر عدد ممكن من الاسئلة اللي بعد كل درس، لإن دا هيفيدك جدًا وهتعرف إن نقط القوة اللي في الدرس دا وممكن تيجي في الامتحان، يعني هتلاقي كام سؤال كدا بيتكرر، فدا هيكون دليل على إن السؤال دا مهم، غالبتالي هتحاول إنك تركز فيه كويس أوي وتعلم عليه بلون مختلف عشان كل ما ترجع للدرس دا، تركز في اللي انت علمت عليه...
5- كتاب المدرسة:-
كتير مننا وأنا كنت كدا برضوا، كنت بنسى كتاب المدرسة ومركزش فيه، ولا أحل الأسئلة اللي بتكون في نهاية الدرس، وكنت بعتمد أكتر على الملخصات اللي معايا وخلاص، أكيد انت بتعمل كدا، ونا بنصحك من دلوقتي، إنك ترجع وتشوف كتاب المدرسة وتحل كل أسئلة نهاية درس، لإن حرفيًا لازم يجي منها أسئلة في الامتحان، ممكن الملخصات مذكرتش السؤال دا من الأساس، ودا الغلط اللي بنكتشفه كلنا، لما بلاقي سؤال غريب في الامتحان، ونفضل نقول إنه مش من المنهج، وبعد كدا نكتشف إنه من الكتاب المدرسي اللي احنا مستلمينه..
6- صلح علاقتك :-
من أهم أسباب التوفيق من ربنا إنك تكون علاقتك بكل الناس كويسة، والأهم من دا علاقتك بأبوك وأمك، في ناس كتير بنلاقي علاقتهم متغيرة مع أقرب الناس ليهم، دا ممكن يكون سبب في اكتئابك أو تعاستك دي، فلو علاقتك كويسة، وتاخد دعوات جميلة منهم وانت رايح الامتحان أو الكورس أو الدروس، صدقني انت من نفسك هتكون مطمن ومرتاح، ودا هيعود عليك بحاجات واستفادة كبيرة إن شاء الله...
7- النوم:-
كتير بيسأل عن عدد ساعات النوم لطلاب الثانوية العامة، ودي ممكن تختلف من شخص لشخص، حسب طبيعة نومه وراحته، لكن نصيحتي ليك إنك تنام مش أقل من 8 ساعات عشان تقوم مركز بعد كدا، وإنك تنام بدري وتصحى بدري، المذاكرة الفعالة لازم تكون بدري عشان مخك بيكون لسه نشيط فيقدر يستوعب أكبر حصيلة ممكنة، وبعد الفجر يعتبر أفضل وقت للمذاكرة..8- تنظيم الوقت:-
لازم تنظم وقتك كويس، وتفصل بين الدروس والمذاكرة، كل حاجة ليها وقتها، مترجعش من الدرس وتقول خلاص، لا ارجع ع الأقل نص ستعة مذاكرة بعد الدرس عشان المعلومة تثبت أكتر، لو هتقرأ بس المهم متركنش لتاني يوم، هيتراكم عليك كتير وهتزهق...
دعاء قبل الامتحانات وأثناء الجلوس في القاعة وتعثر الاجابة
ودي كانت أهم نصائح للمذاكرة، و ازاي اذاكر واجيب مجموع ،أتمنى ليكم التوفيق في الثانوية العامة أو الأزهرية أو الكلية، وأأمل أن أكون أفدتك ولو بمعلومة أو حفزتك إنك تبدأ تذاكر، ومزيدًا من التقدم والنجاح إن شاء الله يا أصدقائي...
أرشح لك هذه المقالة المهمة:
رسميًا .. اجراءات الوقاية لأمتحانات الثانوية العامة 2020
أقرأ أيضًا:-
أضرار التدخين وكيفية الإقلاع عنه .
أفضل أماكن للخروج في القاهرة .
ليست هناك تعليقات:
إرسال تعليق